"RAJA LEUWEUNG"

(bag 3)

KAJADIAN NU DICARITAKEUN TIHEULA TEH MANGRUPA SALAH SAHIJI KAJADIAN TINA RATUS MALAH REBU KAJADIAN LIANNA NU ANTUKNA BAH SUANTA OGE NGARTI  KALAWAN SURTI, KADIDIK SACARA ALAMI KU TINGKAH POLAH PARA RAJA LEUWEUNG AMATIR NU AYA DI PULO JAWA SABAB CENAH ARI RAJA LEUWEUNG ANU PROFESIONAL NA MAH AYANA DI LUAR PULO JAWA.

SALILA DUA PULUH TAUN LEUWEUNG DI TATAR PASUNDAN ASA SAKOTEAP PISAN WARUGANA KARANCANG ACAK-ACAKAN MUN DIJELEMA MAH BADAN JADI KURU, ATI GERING NGAJANGJAWING JIGA AWEWE NU BALIK TI SAUDI DUIT BEAK AWAK RUKSAK TEU KAPALANG NASIB KU SALAKI KALAH DI DUPAK.

 
LEUWEUNG.....NU LUWANG-LIWUNG, GEUS TEU MANGRUPA PUSEUR PARU-PARU DUNYA DEUI. TAPI BADIS WE TEGALAN JEUNG SAMPALAN URUT BITOTAMA MUNDINGLAYA NGALAWAN GURIANG TUJUH ANU GEUS TEU RESEP PERANG DI AWANG-AWANG, TAPI MENDING MILIH BEGALAN PATI NGADU JURIT DILUHUR BUMI TEU KAPALANG SAKALIAN MILU EDAN. DA PERCUMAH CENAH BALIK OGE PASTI DIPAIDO KU HYANG OTIPATI BATARA GURU, SABAB KAPANDEURIAN TEU KABAGEAN MAWA KAI JATI  KA KAHYANGAN KABEH BEAK DIGALAKSAK KU KOMPLOTAN RAJA LEUWEUNG KATUT KUCIAH BANG’PLAK NA.

 

TUMERAPNA PADATARAN DI UNGGAL SUKU GUNUNG JADI ROBAH PERBAWANA, MATAK SANGAR KANA TANAH JEUNG SARUPANING PEPELAKAN. TATANGKALAN ANU NYESA NGARANGRANGAN DAUNNA MARURAG LAMUN PARENG KAHALODOAN, PILEMBURAN KA ANCAM SABAN WAKTU KU BANJIR BANDANG MANGSA USUM HUJAN DATANG.  GUNUNG NU GARUNDUL BUBULAK PABURANTAK TEGALAN JADI KUBANGAN TAYA LAHAN PANGANGONAN, NU AYA UKUR TING RUNGGUNUKNA TANEUH BEUREUM JEUNG BABATUAN SESA BANJIR KABAWA URUG KU CAI PALID NYAEURAN SAWAH KATUT PALAWIJA SABUDEUREUNANA.

AKIBAT OVER DOSIS NGAHARAKANAN KAI MIMITI KARASA KU BALAREA, RAHAYAT JIGA NU KAREK HUDANG SARE TIBRA SADAR TINA ALAM IMPIANANA BARANG NYAKSIAN LEUWEUNG RUKSAK PAKAYA BEAK.  PAJABAT NAGARA MARARUDAH BABARI GEDE ADAT JIGA NU HEUEUH MILU BELA SUNGKAWA KANA PALASTRANA JAGAT WHANA, SABAB NGARASA KETAR-KETIR HARIWANG NAGARA NGAGOLER DIANCAM KRISIS MONETER.  DIMANA-MANA PAJABAT MIYUNI HAYAM KABIRI  NEMBONGKEUN JEUNG NGUMBAR UCAP KAPRIHATINAN ANU KADONGDORA ALAM GEUS AYA DINA KARUKSAKAN.

 
ETA OGE AYA HARITA TEH SELENTING BAWA TI ANGIN KOLEPAT BAWA NING BEJA KA ABAH SUANTA, CENAH PAMARENTAH GEUS NYADIAKEUN BIAYA REBOISASI MASAL. PIKEUN MELAKAN JEUNG NGAYUMAN TANAH LAHAN DI LEUWEUNG ANU GUNUNGNA GARUNDUL, KU BIBIT TATANGKALAN LEUWEUNG UTAMANA DIHEULAKEUN DI PULO JAWA. TAPI DINA WAKTUNA PAMARENTAH NGABATALKEUN DEUI, SABAB CENAH ETA BIAYA REBOISASI TEH DIPAKE HEULA KEUR NGAMODALAN NU LAIN-LAIN.
 
DINA TAUN SALAPAN PULUH DALAPAN ABAH SUANTA NGAJENGHOK MOLOHOK BENGONG BASA NAGARA URANG DITUDUH KU DUNYA LUAR, SALAKU NAGARA NOMER HIJI PALING TEREH NGARUKSAK LEUWEUNG NA BOH DI PULO JAWA ATAWA LEUWEUNG ANU AYA DI LUAR PULO JAWA.  NEPI KA DIANCAM, LEUWEUNG DI NAGARA URANG GEUS TEU BISA ASUP KANA SYARAT PIKEUN MEUNANG “EKO LEBEL” PILEUWEUNGAN ATAWA KAHUTANAN. 

HAL ETA TEH SANGGEUSNA KAPEREGO YEN DIJALUR LALU-LINTAS LAUT INTERNASIONAL KAI-KAI BARULEUD TI SUMATRA, KALIMANTAN, SULAWESI JEUNG SAJABANA, DIBARAWA KU PARA PANYULUNDUP KA MANCANAGARA KU POLAHNA PARA RAJA LEUWEUNG PROFESIONAL TEA.  TAH ETA KAI-KAI ANU BARULEUD TEH KU URANG DUNYA LUAR DISAREBUT KAI “LOG”,  BAKAT KU LOBA-LOBANA JUMLAH KAINA NYA DISEBUT “LOGING” NGAN HANJAKAL MARAWANA MAKE CARA-CARA ANU TEU RESMI ATAWA “ILEGALL.”

 

DASAR ATUH RAJA LEUWEUNG NU WANGKELANG SARAKAH JEUNG LOBA AKAL DITUDUH KU BATUR KITU TEH LAIN ERA PARADA, TAPI KALAH ASA MOBOK MANGGIH GOROWONG MEUNANG BONGBOLONGAN JAMPE PAMAKE KU KECAP  “LOGING” JEUNG “ILEGAL”.  

LAMUN DISUNDAKEUN MAH MEUREUN ETA KECAP TEH SARUA JEUNG MAWA KAI HENTEU RESMI ALIAS MEUNANG MALING, KUSABAB HAYANG JADI KEREN KU PARA INOHONG DILARAPKEUN JADI KECAP “ILEGAL LOGING” DIJIEUN TAMENG PAMINDING MALING.........TAPI PUNTEN SANES KA BAPA.....HA HA....!!

TIWAKTU HARITA RAJA LEUWEUNG PASANG AKSI MALING KAI MARAKE DASI NYEBARKEUN KUMAHA CENAH MATIHNA MUN NGALANGGAR ILEGAL LOGING......, NAJAN KA NINI-NINI JEUNG AKI-AKI ANU COBA-COBA MALING SULUH TI LEUWEUNG BAKAL KEUNA KU “ILEGAL LOGING.” HAHAHAHAHA....TEGEP LAH...!! Cag heula...

"RAJA LEUWEUNG"

(bag 2)

DINA AHIR DEKADE TAUN TUJUH PULUHAN NEPI KA AHIR KALUNGGUHAN ORDE BARU AYA ISTILAH ANU DISEBUT “SADUL ATAWA TUKANG NYADUL” SESEBUTAN PIKEUN KELOMPOK TUKANG MALINGAN KAI TI LEUWEUNG. MINANGKA GELAR RAJA LEUWEUNG AMATIRAN NU NAREKAB DI TATAR PASUNDAN HUSUSNA, DI PULO JAWA PADA UMUMNA.

 
MANGSA HARITA MAH KABANDUNGAN KU ABAH SUANTA AMPIR KABEH PAGAWE NAGARA JIGA AWEWE NU KEUR NYIRAM MUNGGARAN LAMUN PARENG NEMPO TANGKAL KAI  MULUS NARANGNGTUNG DI LEUWEUNG JIGA TUTURUS, GEUS PUGUH NING ARI RAHAYAT BIASA MAH TIBELAAN TUNGGUL DIRARUD CATANG DIREUMPAK JADI JURIG NYILIWURI SABAN PEUTING UCING-UCINGAN JEUNG APARAT  KAAMANAN.
 
ANCAMAN ANU KAWILANG GEDENA DINA JAMAN HARITA DATANG TINA CIKAL-BAKAL KAHIRUPAN EKONOMI ANU KACIDA SAMPORETNA WALURAT KUSANDANG KATUT PANGAN PIKEUN RAHAYAT DI SABUDEUREUN KAWASAN LEUWEUNG, DIJIEUN PELUANG DIJADIKEUN MEDIA DURJANA KU PARA DEDENGKOT RAJA LEUWEUNG NU ARAYA DI KOTA. GEUS LAIN RAHASIAH DEUI DITIAP PAKARANGAN LEGA HAREUPEUN PAKARANGAN IMAH JELEMA BEUNGHAR PABALATAK KAI-KAI GOLONDONGAN BOH KAI TI LEUWEUNG NAGARA ATAWA KAI TI LEUWEUNG RAKYAT, BORORAAH AYA ANU MARIKSA SUMAWONA GANA-GANA KUMAWANI REK NYITA MAH PASTI PINANGGIH JEUNG PANCABAYA.

 
KUNGSI DINA JAMAN KAHUTANAN MASIH KENEH MAKE ISTILAH KAPALA BAGIAN DAERAH HUTAN ATAWA “KBDH”, AYA KAJADIAN ANU MATAK HEMENG  PIKEUN BAH SUANTA NEPI KA KABAWA NGUMBARA KA PADASUKA AYEUNA MASIH KENEH KASUAT-SUAT.  NYAETA DINA WAKTU OPERASI “WHANA BUANA 78” ABAH SUANTA MILU OPERASI DI DAERAH SUKANAGARA, LEBAH CIHARUM MEGAT OPAT MOBIL TREUK MUAT CAU ARI DIPARIKSA DINA JERO BAK TREUK TEH MASING-MASING MUAT KAI JATI GOLONDONGAN. ETA KAI TEH TEU MAKE DOKUMEN ANU SAH UKUR AYA KWITANSI HARGA KAI, ANU TIAP TREUK NA TEU KURANG TI GENEP KUBIKAN KAI JATI, CEUK SUPIR JEUNG PANGAWALNA ETA KAI TEH DIANGKUT TI LEUWEUNG DAERAH AGRABINTA.
 
ATUH PUGUH WE ASA KABIRUYUNGAN DIGAWE TEH TEU GAPLAH......YEUH, CEUK PAMIKIR BAH SUANTA SAPARAKANCA HARITA.  TINA HASIL PAMARIKSAAN SINGKAT  DI JALAN NURUTKEUN KATERANGAN ANU NGAWALNA, YEN ETA OPAT MOBIL TREUK MUATAN KAI JATI TEH KAGUNGAN KANGJENG PRABU ANU LINGGIH DI KOTA BOGOR. TAPI  KUSABAB TEU BISA NEMBONGKEUN DOKUMEN KAI ANU SAH, TETEP ETA OPAT TREUK MUATAN KAI DIBAWA KA KOTA REK DISETORKEEUN KA DUNUNGAN DI PADEPOKAN AMPERA PIKEUN DI PROSES SAKUMAHA MISTINA.

 
BAGJA DINA HATE NUPINUH KURASA GULIGAH PEDAH GEUS BOGA HASIL GAWE NU RANCAGE, MEUNANG DUA POE BAH SUANTA NGADAGOAN SUGAN AYA DEUI PARENTAH OPERASI WHANA BUANA.  MA’LUM HARITA ABAH SUANTA HIRUP MASIH LELENGOHAN KENEH  ACAN LOBA MIKIRAN PANGABUTUH NAJAN DUIT TEU BOGA, MAKSAKEUN WE KUDU BETAH CICING DI IMAH.

 
NINGGANG POE KA TILU, REBUN KENEH BAH SUANTA GEUS AYA NU NYUSULAN KUDU GEUWAT KA PADEPOKAN NGAGABUNG JEUNG KANCA ANU KAMARI MILU OPERASI, CENAH MAH KUDU MANGKAT BARENG KA KOTA BOGOR.  DATANG KA PADEPOKAN ENYA WE KANCA BAH SUANTA ANU TILUAN GEUS NYAMPAK DARINES NAKER, SANGGEUS SAGALA SIAP ABAH SUANTA SAPARAKANCA DIJAJAPKEUN MAKE MOBIL JEEP DISUPIRAN KU PA ANWAR SUKRO NGALIWATAN CIPANAS JEUNG PUNCAK MURU KA KOTA BOGOR.

TEU KASAWANG BUNGAH BUNGANGANGNA BAH SUANTA HARITA NU DINA PAMIKIRNA BAKAL MEUNANG HADIAH ATAWA PALING HENTEU PENGHARGAAN TI KANGJENG PRABU, DICITA-CITA MUN DIBERE DUIT REK DIPAKE MEULI CALANA "BLUE JEAN’S” ANU HARGANA TILU REBU LIMARATUS PERAK JAMAN HARITA.

 
LAKADALAH.....SALAH PISAN TINA PANYANGKA, BAH SUANTA SAPARAKANCA LAIN REK DIBERE HADIAH. TAPI KALAHKA DIPARIKSA BARI DINAHA-NAHA MAKE KUMAWANI NAHAN OPAT MOBIL TREUK NU MUAT KAYU JATI..? BERES DIPARIKSA TEU MEUNANG BALIK KA CIANJUR TAPI DI STRAAF HEULA MEUNANG TILU POE UNGGAL ISUK KUDU DIPOE BARI NGAHORMAT KANA BANDERA....HAHA HAAY...DASAR RAJA WISUNA..SAGALA RUPANA TARA NYAMBUNG....!! Cag ah...

"RAJA LEUWEUNG"

(bag 1)

LAMUN URANG NGADENGE KECAP RAJA LEUWEUNG KONOTASINA PASTI KANA SATO LEUWEUNG NU DISEBUT “SINGA” ATAWA “MAUNG” JEUNG SAJABANA, ANU TARA BEUNANG MUN DIBORO PANINGGARAN. 

LAIN DEUI RAJA LEUWEUNG ANU BAKAL DIPEDAR KU BAH SUANTA DINA LAMAN CANGGIH IEU MAH, NYAETA MANGRUPA BIBIT RURUJIT RAJA WISUNA USUNG ESANG NGAGALAKSAK. NU NGAKIBATKEUN BOH LEUWEUNG NAGARA, ATAWA LEUWEUNG RAKYAT JADI RUKSAK. POKO PEDARAN TINA PANGALAMAN JEUNG CARITA NYATA BAH SUANTA HAL-IHWAL PILEUWEUNGAN (KAHUTANAN), NU AYA DI TATAR PASUNDAN UMUMNA ATUH KHUSUSNA LEUWEUNG NU AYA DI CIANJUR PAKIDULAN ANU BEUKI DIEU BEUKI NGARANGRANGAN.

MATERI NU BAKAL DIPEDAR MANGRUPA BAHASAN TERBUKA KEUR UMUM KALAWAN BEBAS TUR EUWEUH RAHASIAH SANGKAN GAMPANG NALA’AHNA, JEUNG KUMAHA GAMBARAN NGOMEAN KAHAREUP NA. ANU DIANGGAP PALING PENTING KU BAH SUANTA DINA IEU BAHASAN, KUMAHA MEKANISME DAUR ULANG JEUNG REKLAMASI KATUT REBOISASI LEUWEUNG NU GARUNDUL BISA DI PIWANOH JEUNG DIKANYAHOKEUN KU RAHAYAT. 

ANU CENAH CEUK BEJA ETA PROGRAM TEH GEUS LUMANGSUNG TI JAMAN ORDE BARU MULA, ATUH MEUREUNAN ARI KITU MAH NEPI KA AYEUNA TEH SAKUDUNA TATA GUNA LEUWEUNG GEUS KACIDA HARMONISNA JEUNG ALAM SA-BUDEUREUNANA.

LA’KADALAAAAH....NA KAMANA TINA KABEH PROGRAM NU PULUHAN TAUN ETA, BET GEUNING KIWARI LAIN JADI ALAM NU HARMONIS. KUDUNA MAH TEPIS WIRING MUMUNGGANG JEUNG BIWIR LAMPING MEREBET KU SENGKED TERAS SIRING, DIPASIEUP KU TERSIER JEUNG TUMPANG SARI. SURUP PAYUS MAPAESAN RUNGGUNUK’NA SUKU GUNUNG ANU SUBUR, HEJO LEMBOH KU TATANGKALAN MATAK SONO ANU NENJO. TAPI MALAH SABALIKNA ALAM JAGAT PABURANTAK JIGA LEUNGIT KASAIMBANGAN TEU KUAT NAHAN DIG’JAYANA RAJA LEUWEUNG NU NGARAKSUK DI MANA-MANA. 

TEU DI KAMPUNG TEU DIKOTA SARUA PAHEULA-HEULA JIGA NEANG PAKAYA NINI AKI’NA. TI MIMITI RAHAYAT BIASA TEPA KA PAJABAT DESA NEPI KA PAJABAT NAGARA. ESTU JIGA ANU SA’UYUNAN MITEMBEYAN. PANG-PANGNA PAJABAT NU AYA DI KOTA CUKUP MARENTAH TUKANGEUN MEJA BARI MODAL SAKATIGA, MUN DIPONDAH PAMENTANA MATAK CILAKA PAJARKEUN TEU BISA….KUMAWULA.

TI MIMITI OPERASI WANA BHUANA TAUN 1979 NEPI KA OPERASI BALOK LODAYA, OPERASI WANA LAGA, NU PANG’AHIRNA OPERASI JATI LESTARI 2008. BAH SUANTA GEUS BISA NGARASAKEUN RUPA-RUPA METODE, NU PASALIA TINA TUJUAN NGAWUJUDKEUN SISTIM NGAMANKEUN JEUNG NGALESTARIKEUN LEUWEUNG.

TAPI DALAH DIKUMAHA UKUR BOGA MODAL RESEP JEUNG MICINTA KANA TUGAS NAGARA, BAH SUANTA TEU ARAL SUBAHA TETEP AJEG PANCEG SAKUMAHA MISTINA. LUANG JEUNG PANGALAMAN NU KAPANGGIH SALILA MILEUWEUNGAN KU AYANA RE-GENERASI KA PARA PONGGAWA LEUWEUNG, GEUS MERE HAREPAN KA BAH SUANTA. YEN CENAH LAMUN ISUK JAGANING PAGETO NAGARA BEBAS TINA PANG’RANJAH SI RAJA LEUWEUNG DIGANTI KU GENERASI NU SABANDA-SARIKSA RUMAWAT KANA LEUWEUNG TOWEKSA KA SARAKAN PASTI ANAK INCU BAKAL PINANGGIH JEUNG KARAHARJAAN.

KATAMBAH KU LOBANA IDE-IDE TI PARA INOHONG NU JEMBAR PANALARNA NGAHAJA NEMBONGKEUN PANGDEUDEUL KANA NYIPTAKRUN LESTARINA LEUWEUNG KATUT ALAM LINGKUNGANANA, DIWUJUDKEUN NGALIWATAN SISTIM PENGELOLALAAN HUTAN BERSAMA MASYARAKAT NU DISEBUT “PHBM”, LEMBAGA MASYARAKAT DESA HUTAN ANU DISEBUT “LMDH” JEUG KELOMPOK TANI HUTAN DISEBUTNA “KTH”. 

BAH SUANTA BEUKI REUG-REUG KANA PAMIKIRANANA. GEUNING CUNDUK KANA WAKTU NINGGANG GEUS ARELING MAH PARA PAJABAT TEH AYA KAPADULIANANA, SOK SANAJAN ETA SISTIM CAN TANGTU MATAK TEURAK SAKUMAHA PAMAKSUDAN DA GEUNING DI URANG MAH LOBA PISAN BAREBEDANANA TEU KU HANTEU SOK SAGALA SALAH KAPRAH BAE.

LAMUN TEA MAH MIPIT KUDU AMIT MUN REK NGALA KUDU BEBEJA DINA RARAGA MUKA CARITA ABAH SUANTA MERE BEWARA, BISI AYA ANU KASABIT NAMI KASEBAT NAMA BOH KA RAHAYAT ATAWA PAJABAT NAGARA ULAH KIRANG NYA NGAMA’LUM BAH SUANTA MENTA HAMPURA……..!! Cag.

BUBUKA CARITA

Langit lenglang taya mega nu ngahalangan dikenca katuhueun jalan rajeg ku tatangkalan, daunna harejo ngemploh dipasieup kurecetna sora manuk ting geleber saruka bungah. Rasa betah jeung tumaninah singhoreng mun seug pareng ngaliwat ka pilemburan, macangkrama jeung alam padesaan. Tibubulak samar-samar katinggal ngeplakna cai laut sagara pakidulan dihias ku riakna ombak jiga nu keur silih udag, matak waas matak kelar. Teu aya basa carita nubisa kedal iwal ti renghapna nafas tumarima kana ka agungan nu murbeng Alam, parantos maparin kanikmatan ka manusa tanpa wates wangenna.  Basa kuring reureuh dimumunggang padataran gunung sawo handapaeun tangkal camara, sisi jalan anu brasna ka Pananggapan. Paneutep seukeut nyawang alam endah tur asri  bari mawa pangharepan, sugan jeung sugan aya menak nungaguar pependeman sangkan ieu alam bisa jadi mawa  pangupa jiwa pikeun karaharjaan rahayat pakidulan. Iraha atuh menak....jengkar ti pakotaan kersa rurumpaheun ngaroris pakaya sareng budaya alam anu sakieu endahna, pacuan ulah rek hilap mugi salira geura sumping diantos garapanana......!!!